പ്രകാശ് ചന്ദ്രശേഖർ

കോതമംഗലം;ചരിത്ര പ്രസിദ്ധമായ ത്യക്കാരിയൂർ മഹാദേവ ക്ഷേത്രത്തിലെ കൊടിമരം മാറ്റി സ്ഥാപിയ്ക്കുന്നതിനുള്ള നീക്കത്തിന് ഭക്തതി സാന്ദ്രമായ അന്തരീക്ഷത്തിൽ തുടക്കമായി.

കൊടിമരം നിർമ്മിയ്ക്കുന്നതിനുള്ള തേക്ക് മുറിയ്ക്കുന്നതിന് മുന്നോടിയായുള്ള ചടങ്ങുകൾക്ക് ഇന്നലെ തുടക്കമായി.ക്ഷേത്രം തന്ത്രി ബ്രഹ്‌മശ്രീ ഭദ്രകാളി മറ്റപ്പിള്ളി മനയ്ക്കൽ നാരായണൻ നമ്പൂതിരി സബ്ഗ്രൂപ് ഓഫീസർ നീന വിജയൻ, ക്ഷേത്രം ജീവനക്കാർ, ഉപദേശക സമിതിയംഗങ്ങൾ, എന്നിവർ ഉൾപ്പെട്ട സംഘം ചടങ്ങുകളുടെ പൂർത്തീകരണത്തിനായി ഇന്നലെ വാദ്യമേളങ്ങളുടെ അകമ്പടിയോടെ പാലായിൽ തേക്ക് നിൽക്കുന്ന പുരയിടത്തിൽ എത്തിയിരുന്നു.

തൃക്കാരിയൂർ (ആനക്കൂട്ടുങ്കൽ) സരസ്വതിവിലാസത്തിൽ രാധാ.ഡി. നായരും കുടുംബാംഗങ്ങളും സംഭവനയായി നൽകിയ തേക്ക് മരം ആണ് കൊടിമര നിർമ്മാണത്തിനായി പ്രയോജനപ്പെടുത്തുന്നത്.

പ്രകൃതിശക്തികൾക്കും ജീവജാലങ്ങൾക്കും, ഭൂതഗണങ്ങൾക്കും, പ്രത്യേകപൂജകൾ നടത്തി തൃപ്തരാക്കി, മരത്തിനെ ആശ്രയിച്ചുകഴിയുന്ന വിവിധ പക്ഷിമൃഗാദികളോട് അനുവാദവും വാങ്ങിയശേഷം മരത്തിൽ കാപ്പ് കെട്ടിയതോടെയാണ് ഇന്നലത്തെ ചടങ്ങുകൾ അവസാനിച്ചത്.തേക്ക് മുറിയ്ക്കുന്നതിന് മുന്നോടിയായുള്ള ചടങ്ങുകൾ ഇന്ന് രാവിലെയും തുടരും.

ഇന്ന് രാവിലെ അഭിഷേകം, ആയുധം പൂജ, എന്നിവകൾക്ക് ശേഷം മരം മുറിക്കുന്നതിനായി ശിൽപിക്ക് മഴു കൈമാറും.തുടർന്ന് ക്രെയിനുകളുടെ സഹായത്താൽ മരം വെട്ടി നിലം തൊടാതെ വലിയ വാഹനത്തിൽ കയറ്റി, പാലായിൽ നി്ന്നും ക്ഷേത്രത്തിലേക്ക് പുറപ്പെടും.

കോതമംഗലം തങ്കളം കവലയിൽ നിന്നും നാമജപ-വാദ്യമേളങ്ങളുടെ അകമ്പടിയോടെ, ഘോഷയാത്രയായിട്ടാണ് മരം ക്ഷേത്രത്തിൽ എത്തിക്കുക.

ക്ഷേത്രത്തിലെത്തുമ്പോൾ രണ്ട് ക്രെയിനുകളുടെ സഹായത്താൽ നിലം തൊടാതെ തടികൾക്ക് മുകളിലോ, റോളറുകളിലോ വച്ച് ക്ഷേത്രത്തിന്റെ വടക്ക് വശം ദേവസ്വം ഓഫീസിനടുത്ത് എത്തിക്കും.തുടർന്ന് ചെത്തി മിനുക്കി,ഔഷധ കൂട്ടുകൾ ചേർത്ത്,തയ്യാറാക്കുന്ന എണ്ണത്തോണിയിൽ മരം നിക്ഷേപിയ്ക്കും.ഒരു വർഷത്തിനുള്ളിൽ പൂതിയ കൊടിമര പ്രതിഷ്ഠ നടത്താനാവുമെന്നാണ് ക്ഷേത്രോപദേശക സമതിയുടെ കണക്കുകൂട്ടൽ

4 പതിറ്റാണ്ട് മുമ്പ് നിലവിലുണ്ടായിരുന്ന കൊടിമരം നിലം പതിച്ചിരുന്നു.പിന്നീട് സ്ഥാപിച്ച കോൺക്രീറ്റിൽ നിർമ്മതമായ കൊടിമരമാണ് നിലവിള്ളത്.ഈ കൊടിമരം മാറ്റി, തേക്കിൽ തീർത്ത കൊടിമരം സ്ഥാപിക്കുന്നതിനും നിലവിലുള്ള വെള്ളോട്ട് പറകൾ പോളീഷ് ചെയ്ത്, നവീകരണ കലശത്തോടെ പുനഃപ്രതിഷ്ഠാ ചടങ്ങുകൾ നടത്തുന്നതിനുമാണ് കർമ്മപദ്ധതി തയ്യാറാക്കിയിട്ടുള്ളതെന്ന് ക്ഷേത്ര ഉപദേശക സമതി സെക്രട്ടറി അജിത്കുമാർ തൃക്കാരിയൂർ പറഞ്ഞു.

കേരളത്തിലെ നൂറ്റെട്ട് ശിവാലയങ്ങളിൽ ഒന്നായ ഈ ക്ഷേത്രം, പരശുരാമൻ ശിവലിംഗപ്രതിഷ്ഠ നടത്തിയ അവസാനക്ഷേത്രമാണന്നാണ് വിശ്വസിക്കപ്പെടുന്നത്. ആദി ചേരരാജാക്കന്മാരുടെ ആസ്ഥാനമെന്ന് വിശ്വസിക്കപ്പെടുന്ന കരവൂർ (കരോരൈ) ഇന്നത്തെ തൃക്കാരിയൂർ ആണെന്നുള്ള വിലയിരുത്തലുകളും ഉയർന്നിരുന്നു.

മൂവാറ്റുപുഴയാറിന്റെ കൈവഴിയായ കോതയാറിന്റെ വടക്കേക്കരയിലാണ് ക്ഷേത്രം സ്ഥിതിചെയ്യുന്നത്. വൈദ്യനാഥ സങ്കൽത്തിലുള്ള ശിവനാണ് പ്രധാനപ്രതിഷ്ഠ.പാർവതീദേവി ഭഗവാനൊപ്പം നിത്യസാന്നിദ്ധ്യം കൊള്ളുന്നു എന്നാണ് സങ്കല്പം.

ഉപദേവതകളായി ഗണപതി, സപ്തമാതൃക്കൾ, വീരഭദ്രൻ, പരശുരാമൻ, ശാസ്താവ്, നാഗ ദൈവങ്ങൾ, യക്ഷിയമ്മ എന്നിവർക്കും പ്രതിഷ്ഠകളുണ്ട്.മീനമാസം ഒന്നാം തീയതി കൊടികയറി പത്താം തീയതി ആറാട്ടോടെ സമാപിയ്ക്കുന്ന പത്തുദിവസത്തെ ഉത്സവം, കുംഭമാസത്തിലെ ശിവരാത്രി, ധനുമാസത്തിലെ തിരുവാതിര എന്നിവയാണ് ഇവിടത്തെ പ്രധാന ആണ്ടുവിശേഷങ്ങൾ.