മറയൂർ;വിവിധ ആവശ്യങ്ങൾ ഉന്നയിച്ച് കേരള സ്റ്റേറ്റ് കർഷക തൊഴിലാളി യൂണിയൻ (കെഎസ്‌കെറ്റിയു)മറയൂർ ഏരിയ കമ്മിറ്റിയുടെ നേതൃത്വത്തിൽ  മറയൂർ ഗ്രാമ പഞ്ചായത്ത്  ഓഫീസിലേയ്ക്ക് മാർച്ച് നടത്തി.

കർഷക കേന്ദ്രങ്ങളായ കോച്ചാരത്ത് ,ബാബു നഗർ,മാശിവയൽ എന്നിവിടങ്ങളിൽ കേന്ദ്രീകരിച്ച ശേഷം പ്രകടനമായി കർഷകർ ഗ്രാമ പഞ്ചായത്ത് ഓഫീസ് കവാടത്തിലേയ്ക്ക്  എത്തുകയായിരുന്നു.

സി പി ഐ എം ഇടുക്കി ജില്ലാ സെക്രട്ടറി സി വി വർഗീസ് ഉദ്ഘാടനം ചെയ്തു.

ലൈഫ് ഭവന പദ്ധതി സർക്കാർ പ്രതിസന്ധികൾക്കിടയിലും സർക്കാർ നടപ്പിലാക്കുന്നത് ആരും തെരുവിൽ അന്തിയുറങ്ങാനോ വീടില്ലാത്തതിനാൽ ഒരു തരത്തിലുള്ള അന്യതാബോധവും ഇല്ലാതെ അഭിമാനത്തോടെ ജീവിക്കാനും വേണ്ടിയാണെന്ന് സി വി വർഗീസ് പറഞ്ഞു.

ഗുണഭോക്താക്കളെ തിരഞ്ഞെടുക്കുന്നത് മാനദണ്ഡങ്ങൾ മാത്രം പരിഗണിച്ച് ആവണം. വീടുകൾ അനർഹർക്ക് നൽകി നിയമവിരുദ്ധമായി വിൽപ്പന നടത്തുന്നതിന് കൂട്ടു നിന്ന് ജയിലിൽ പോകാതെ ഉദ്യോഗസ്ഥർ നോക്കണം .അദ്ദേഹം കൂട്ടിച്ചേർത്തു.

മറയൂരിലെ കർഷക തൊഴിലാളികൾക്ക് ന്യായമായ കൂലി ഉറപ്പാക്കാനും, കർഷകർക്ക് യഥാസമയം തൊഴിലാളികളെ ലഭിക്കാനും സംസ്ഥാന സർക്കാർ ആഹ്വാനം ചെയ്ത കാർഷിക തൊഴിൽ സേന രൂപീകരിക്കുക,ലൈഫ് പദ്ധതിയിലെ അഴിമതി അന്വേഷിക്കുക,10-ൽ അധികം വീടുകൾ വിറ്റത് അന്വേഷിച്ച് കർശന നടപടി സ്വീകരിക്കുക,ലൈഫ് പദ്ധതിയിൽ മാനദണ്ഡം മറികടന്ന് ഇഷ്ടക്കാർക്ക് വീട് എഗ്രിമെന്റ് വയ്ക്കുന്നത് അവസാനി പ്പിക്കുക,ജലനിധി ഫിൽട്ടർ ടാങ്ക് നിർമ്മാണത്തിലെ അഴിമതി അന്വേഷിക്കുക,ശുദ്ധീകരിച്ച കുടിവെള്ളം വിതരണം ചെയ്യുക തുടങ്ങിയവയായിരുന്നു പ്രതിഷേധക്കാർ ഉന്നയിച്ച പ്രധാന ആവശ്യങ്ങൾ.

ജലനിധി കുടിവെള്ള വിതരണത്തിലെ സംഭരണി നിർമ്മാണത്തിലെ അഴിമതി അന്വേഷിക്കുക. ശുദ്ധികരിച്ച കുടിവെള്ളം വിതരണം ചെയ്യുക. ലൈഫ് ഭവന പദ്ധതിയിൽ വീട് നിർമാണത്തിന് കരാറുകാരെ നിർബന്ധപൂർവ്വം ചുമതലപ്പെടുത്തുന്നത് അവസാനിപ്പിക്കുക എന്നീ ആവശ്യങ്ങളും ഇക്കൂട്ടർ ഉന്നയിച്ചിരുന്നു

സി പി ഐ എം ഇടുക്കി ജില്ലാ സെക്രട്ടറിയേറ്റംഗം എം ജെ മാത്യു, സി പി ഐ എം മറയൂർ ഏരിയ സെക്രട്ടറി വി സിജിമോൻ എന്നിവർ മാർച്ചിനെ അഭിവാദ്യം ചെയ്തു

കെ എസ് കെ ടി യു ഏരിയ പ്രസിഡൻ്റ് ജെയിംസ് മാത്യു അധ്യക്ഷനായി. സി പി ഐ എം ടൗൺ ലോക്കൽ സെക്രട്ടറി എസ് അണ്ണാദുര, കെ എസ് കെ ടി യു ഏരിയ സെക്രട്ടറി എസ് ചന്ദ്രൻ , എസ് ചന്ദ്രൻ രാജ , പി എം ലാലു, കനകാസ്യൻ ബിജു എന്നിവർ സംസാരിച്ചു.

മറയൂർ: ചിന്നാർ വന്യജീവി സങ്കേതത്തിനു സമീപമുള്ള മറയൂർ കരിമുട്ടി മേഖലയിൽ കാട്ടാന ശല്യം രൂക്ഷം.

വട്ടവയലിൽ ജോൺസന്റെ കൃഷികൾ കഴിഞ്ഞ ദിവസം കാട്ടാനകൂട്ടംനശിപ്പിച്ചു.

തെങ്ങ്, വാഴ, കമുക്, എന്നിവയ്ക്ക് പുറമെ കരിമ്പും വ്യാപകമായി നശിപ്പിയ്ക്കപ്പെടുന്നുണ്ട്.

കരിമ്പിൻ പാടങ്ങളുടെ നാശം ഭൗമസൂചിക പദവി ലഭിച്ച മറയൂർ ശർക്കരയുടെ ഉൽപ്പാദനത്തെ ബാധിയ്ക്കുമോ എന്ന ആശങ്കയും വ്യാപകമായിട്ടുണ്ട്.

കഴിഞ്ഞ ഏഴ് വർഷത്തിനിടെ 3,500 ഏക്കറിൽ നിന്ന് 400 ഏക്കറായി കരിമ്പ് കൃഷി ചുരുങ്ങി, ഇതിന് പ്രധാന കാരണം കാട്ടാന ശല്യമാണെന്നാണ്  ചുണ്ടികാണിയ്ക്കപ്പെടുന്നത്.

മറയൂർ: സർക്കാർ ആശുപത്രിയുടെ വളപ്പിൽ നിന്ന് ഏകദേശം അഞ്ച് ലക്ഷം രൂപ വിലമതിക്കുന്ന ചന്ദനമരം മുറിച്ച് കടത്തി.

ആശുപത്രിയുടെ പിൻവശത്ത്,വനം വകുപ്പിന്റെ ഓഫിസിന് സമീപമുള്ള പ്രദേശത്ത് നിന്നാണ് ഇന്നലെ രാത്രി കാട്ടുകള്ളന്മമാർ മരം മുറിച്ചു കടത്തിയത്.

രാത്രി മുഴുവൻ വാച്ചർമാരുടെ നിരീക്ഷണത്തിലുള്ള സുരക്ഷിത മേഖലയിൽ നിന്നാണ്  മരം അപ്രക്ഷ്യമായത്. സംഭവം വനംവകുപ്പിന്  നാണക്കേടായിട്ടുണ്ടെന്നാണ് പൊതുവെയുള്ള വിലയിരുത്തൽ.

വനംവകുപ്പ് ഓഫിസിന് തൊട്ടടുത്തുള്ളതും വാച്ചർമാരുടെ നിരന്തര നിരീക്ഷണത്തിലുള്ളതുമായ പ്രദേശത്തു നിന്നും മരം മുറിച്ചുകടത്തുന്നതിന് ഇടയാക്കിയത് സുരക്ഷാ വ്യവസ്ഥകളിലെ ഗുരുതര പിഴവാണെന്നാണ് പരക്കെ ഉയർന്നിട്ടുള്ള ആരോപണം.

സംഭവത്തിൽ  മറയൂർ പോലീസ് കേസെടുത്ത്  അന്വേഷണം ആരംഭിച്ചിട്ടുണ്ട്. കുറ്റവാളികളെ കണ്ടെത്തുന്നതിനായി സമീപത്തെ സിസിടിവി ദൃശ്യങ്ങൾ പരിശോധിക്കുന്നതുൾപ്പെടെ ഊർജിതമായ നടപടികൾ സ്വീകരിക്കുമെന്ന് പോലീസ് അറിയിച്ചു

സ്വകാര്യ ഭൂമിയിലോ പൊതുസ്ഥലങ്ങളിലോ നിന്ന് ചന്ദനമരം മോഷണം പോയാൽ അന്വേഷണ ചുമതല പോലീസിനാണ്.റിസർവ്വ് വനമേഖലയിൽ നിന്ന് ഇത്തരത്തിൽ മരം മുറിച്ച് കടത്തിയാൽ നിലവിലെ നിയമമനുസരിച്ച് വനം വകുപ്പിന് നേരിട്ട് മേൽ നടപടികൾ സ്വീകരിയ്ക്കാം.

സ്വകാര്യ ഭൂമിയിലും പൊതുസ്ഥലങ്ങളിലും ചന്ദനമര മോഷണം പതിവായിട്ടുണ്ടെങ്കിലും, ഫലപ്രദമായ അന്വേഷണം നടക്കുന്നില്ലന്നാണ് ചൂണ്ടികാണിയ്ക്കപ്പെടുന്നത്.