കോതമംഗലം : കോതമംഗലം മേഖലയിൽ വന്യ ജീവി ആക്രമണത്തിൽ കൊല്ലപ്പെട്ടവരുടെ ആശ്രിതകർക്ക് വനം വകുപ്പ് ജോലി നൽകുന്ന കാര്യത്തിൽ നിയമ പരമായ സാധ്യത പരിശോധിക്കുമെന്ന് വനം മന്ത്രി എ കെ ശശീന്ദ്രൻ.

കോതമംഗലം മണ്ഡലത്തിൽ 650.16 ലക്ഷം രൂപയുടെ പ്രതിരോധ പ്രവർത്തനങ്ങൾ പ്രത്യേകമായി നടപ്പിലാക്കി വരുന്നതായും, ചീഫ് വൈൽഡ് ലൈഫ് വാർഡനോട് പ്രദേശങ്ങൾ സന്ദർശിക്കുവാൻ നിർദ്ദേശം നൽകിയതായും മന്ത്രി നിയമസഭയിൽ അറിയിച്ചു.

കോതമംഗലം മണ്ഡലത്തിലും പരിസരപ്രദേശങ്ങളിലും വന്യജീവി ആക്രമണം തുടർക്കഥയാകുന്ന സാഹചര്യത്തിൽ വനംവകുപ്പിന്റെ കൂടുതൽ ജാഗ്രതയോട് കൂടിയ ഇടപെടലുകളും പ്രതിരോധമാർഗ്ഗങ്ങളും ഉണ്ടാകണമെന്നും,കൊല്ലപ്പെട്ടവരുടെ ആശ്രിതർക്ക് വനംവകുപ്പ് ജോലി നൽകണമെന്നും ആവശ്യപ്പെട്ടുകൊണ്ട് ആന്റണി ജോൺ എം എൽ എ ഉന്നയിച്ച സബ്മിഷന് മറുപടിയായിട്ടാണ് മന്ത്രി ഇക്കാര്യം സഭയിൽ വ്യക്തമാക്കിയത്.

കോതമംഗലം നിയോജക മണ്ഡലത്തിലും, പരിസരപ്രദേശങ്ങളിലും കഴിഞ്ഞ വർഷം തന്നെ കാട്ടാനകളുടെ മുന്നിൽപ്പെട്ട്‌ മൂന്ന് പേർക്കാണ് ജീവൻ നഷ്ടമായത്. കഴിഞ്ഞ ഡിസംബർ മാസം 14-ന്‌ മൂന്നാർ വനം ഡിവിഷനിൽ നേര്യമംഗലം റേഞ്ചിൽ നേര്യമംഗലം-ഇടുക്കി റോഡിലേക്ക്‌ കാട്ടാന മറിച്ചിട്ട പന വീണ്‌ ഇരുചക്ര വാഹനത്തിൽ യാത്ര ചെയ്ത ആൻമേരി സി.വി എന്നയാൾ മരണപ്പെട്ടിരുന്നു. 17 -നാണ് മൂന്നാർ ഡിവിഷനിൽ നേര്യമംഗലം റേഞ്ചിൽ ഇഞ്ചത്തൊട്ടി സ്റ്റേഷൻ പരിധിയിൽവെച്ച്‌ കാട്ടാനയുടെ ആക്രമണത്തിൽ എൽദോസ്‌ എന്നയാൾ കൊല്ലപ്പെട്ടത്.

29 -ന്‌ കോതമംഗലം ഡിവിഷനിൽ മുള്ളരിങ്ങാട്‌ റേഞ്ചിൽ ചുളളിക്കണ്ടം സെക്ഷൻ പരിധിയിൽ പശുവിനെ മേയ്ക്കാൻ പോകവെ കാട്ടാനയുടെ ആക്രമണത്തിൽ കൊല്ലപ്പെട്ട അമർ ഇലാഹി എന്നയാളാണ് ഇതിൽ അവസാനത്തേത്.വിഷയം ഏറെ ദൗർഭാഗ്യകരമായ കാര്യമാണെന്നും, പ്രദേശങ്ങളിൽ വന്യജീവി ആക്രമണം വർദ്ധിച്ച് വരുന്നതായി സർക്കാരിന്റെ ശ്രദ്ധയിൽ പെട്ടിട്ടുണ്ടെന്നും മന്ത്രി വ്യക്തമാക്കി.

ആന്റണി ജോൺ എം എൽ എ ഈ വിഷയത്തിൽ നിരന്തരം സബ്മിഷനുകൾ ഉന്നയിക്കുന്നുണ്ട്‌ എന്ന് വ്യക്തമാക്കിയ മന്ത്രി കോതമംഗലം നിയോചകമണ്ഡലത്തിന് തന്നെ പ്രത്യേക പരിഗണന നൽകി നിരവധി പ്രതിരോധ പ്രവർത്തനങ്ങൾ നടപ്പിലാക്കിവരുന്നതായും അറിയിച്ചു.
പ്രദേശത്ത് അടിയന്തര സാഹചര്യങ്ങളെ നേരിടാൻ മൂന്ന്‌ ആർ.ആർ.ടികളും 24 മണിക്കൂറും പ്രവർത്തിക്കുന്ന ഡിവിഷൻ എമർജൻസി കൺട്രോൾ റൂമും പ്രവർത്തന സജ്ജമാണെന്നും മന്ത്രി പറഞ്ഞു.
പ്രസ്തുത പ്രവർത്തനങ്ങളെക്കുറിച്ച്‌ മുൻപ്‌ സഭയിൽ അവതരിപ്പിച്ചിട്ടുള്ളതിനാൽ അതിലേക്ക് കടക്കുന്നില്ലെന്ന് വ്യക്തമാക്കിയ മന്ത്രി പ്രതിരോധ പ്രവർത്തനങ്ങൾ ഊർജിതപ്പെടുത്തി സമയ ബന്ധിതമായി പൂർത്തീകരിക്കാൻ നടപടികൾ സ്വികരിക്കുമെന്നും, പ്രതിരോധ പ്രവർത്തനങ്ങൾക്കായി എം.എൽ.എ ഫണ്ടിൽ നിന്നും തുക അനുവദിച്ചത് സ്വാഗതാർഹമാണെന്നും പറഞ്ഞു.

കാട്ടാനയുടെ ആക്രമണത്തിൽ മരണപ്പെട്ടവരുടെ കുടുംബത്തിന്‌ സർക്കാരിന്‌ നിയമപരമായി ചെയ്യാൻ കഴിയുന്ന എല്ലാ സഹായവും ഉണ്ടാകുമെന്നും, നഷ്ടപരിഹാരം സമയബന്ധിതമായി ലഭ്യമാക്കുന്നതിന്‌ ആവശ്യമായ നിർദ്ദേശങ്ങൾ നൽകിയതായും,കാട്ടാന ആക്രമണത്തിൽ മരണപ്പെട്ടവരുടെ ആശ്രിതർക്ക്‌ സർക്കാർ ജോലി നൽകണമെന്ന ആവശ്യവുമായി ബന്ധപ്പെട്ടുള്ള നിയമ സാധ്യതകൾ പരിശോധിക്കുമെന്നും മന്ത്രി ഉറപ്പ് നൽകി.

കാർഷിക വിളകളുടെ നഷ്ടപരിഹാരം സംബന്ധിച്ച വിഷയത്തിൽ 2024 മാർച്ച്‌ വരെയുള്ള എല്ലാ അപേക്ഷകളിലും തീർപ്പ്‌ കല്പിച്ചതായും,ധനലഭ്യതയ്ക്ക്‌ അനുസരിച്ച്‌ ബാക്കിയുള്ളവയിലും പരമാവധി വേഗത്തിൽ തീർപ്പ്‌ കൽപ്പിക്കുന്നതിനാണ്‌ വനം വകുപ്പ്‌ ശ്രമിച്ചുകൊണ്ടിരിക്കുന്നതെന്നും, കോതമംഗലത്തെ വിഷയങ്ങളെ സംബന്ധിച്ച് അടിയന്തരമായി പഠിക്കാനും, ആക്ഷൻ പ്ലാൻ തയ്യാറാക്കുന്നതിന്റെ ഭാഗമായി മുഖ്യ വനപാലകൻ ചീഫ് വൈൽഡ് ലൈഫ് വാർഡനോട്‌ ആവശ്യമായ ഇടപെടൽ നടത്താൻ കോതമംഗലത്തെ ബന്ധപ്പെട്ട ഉദ്യോഗസ്ഥരുമായി ചർച്ചകൾ നടത്തി മുൻഗണന ക്രമത്തിൽ നടപ്പിലാക്കേണ്ട കാര്യങ്ങളെ സംബന്ധിച്ച രൂപരേഖ തയ്യാറാക്കാനും നിർദ്ദേശം നൽകിയതായും മന്ത്രി എ കെ ശശീന്ദ്രൻ സബ്‌മിഷന് മറുപടിയായി നിയമസഭയിൽ അറിയിച്ചു.