നെൽസൻ പനയ്ക്കൽ

മുവാറ്റുപുഴ; കൊച്ചി – ധനുഷ്‌കോടി ദേശീയ പാതയിലെ ഇപ്പോൾ നടന്നുകൊണ്ടിരിക്കുന്ന പുനരുദ്ധാരണ പ്രവർത്തനങ്ങളിൽ ബൈപ്പാസുകൾ യാഥാർത്ഥ്യമാക്കൻ എല്ലാവരും സഹകരണം വേണമെന്ന് ഡീൻ കുര്യാക്കോസ് എം.പി.2023-24 സാമ്പത്തിക വർഷം കേന്ദ്ര ഉപരിതല ഗതാഗത വകുപ്പ് എൻ.എച്ച്.എ.എൽ മുഖാന്തിരം അനുവദിച്ച പദ്ധതി എൻ.എച്ച് (0) ഗണത്തിലാണ് അനുവദിക്കപ്പെട്ടത്.

തുടർന്ന് വളരെ വേഗത്തിൽ നടപടിക്രമങ്ങൾ ആരംഭിച്ചു.ആദ്യ ഘട്ടത്തിൽ 3 എ നോട്ടിഫികേഷനും, തൊട്ടു പിന്നാലെ 3 എ നോട്ടിഫിക്കേഷനും (7.12.2023) പുറത്തിറങ്ങി. എന്നാൽ തുടർന്ന് 3 ഡി വിജ്ഞാപനത്തിലേക്ക് സമയബന്ധിതമായി എത്തിക്കാൻ സംസ്ഥാന സർക്കാരിന്റെ നിയന്ത്രണത്തിലുള്ള ഭൂമി ഏറ്റെടുക്കൽ നടപടികൾ ചെയ്യുന്ന സി.എ.എൽ.എ (കൊപീറ്റണ്ട് അതോറിറ്റി ഫോർ ലാൻ്റ് അക്വിസിഷൻ) യ്ക്കായില്ല.

എൻ.എച്ച്.എ.എൽ പല പ്രാവശ്യം സമയബന്ധിതമായി ഭൂമി ഏറ്റെടുക്കൽ നടപടികൾ പൂർത്തീകരിച്ച് കഴിഞ്ഞ മാർച്ച് മാസം തന്നെ പദ്ധതിയാരംഭിക്കേണ്ടതുണ്ട് എന്ന് ഓർമ്മപ്പെടുത്തിയിരുന്നു. 2024 ജനുവരി 31ന് സംസ്ഥാന ചീഫ് സെക്രട്ടറിക്ക് അയച്ച കത്തിൽ ഇക്കാര്യങ്ങൾ കൃത്യമായി വ്യക്തമാക്കിയിട്ടുണ്ട്.

2024 ഫെബ്രുവരി മാസം 5ന് ആയിരുന്നു 3ഡി വിജ്ഞാപനത്തിനായി കാലാവധി നിശ്ചയിച്ചിരുന്നത്. എന്നാൽ അത് പൂർത്തീകരിച്ചില്ല.

കഴിഞ്ഞ സാമ്പത്തിക വർഷം ഭൂമി ഏറ്റെടുക്കലിനും, പദ്ധതി തുകയ്ക്കുമായി നിശ്ചയിച്ചിരുന്ന തുക കഴിഞ്ഞ സാമ്പത്തിക വർഷം അനുവദിച്ചിരുന്നതിൽ നിന്നും ചിലവാക്കുവാനുള്ള സാധ്യതകൾ ഇതോടെ ഇല്ലാതായി.പിന്നീട് പുതിയ സാമ്പത്തിക വർഷത്തിൽ (2024-25) ഏപ്രിൽ അവസാനത്തോടെയാണ് 3ഡി വിജ്ഞാപനത്തിനായുള്ള ഡേറ്റ എൻ.എച്ച്.എ.എല്ലിയ്ക്ക് നൽകുന്നത്.

ഈ ഘട്ടത്തിൽ സാമ്പത്തിക വർഷം മാറിയതിനാൽ പദ്ധതി തുകക്ക് വേണ്ടി വീണ്ടും മന്ത്രാലയത്തിൻ്റെ അനുമതി ലഭ്യമാക്കേണ്ടതുണ്ട്. ഭൂമി ഏറ്റെടുക്കലിനായി നിശ്ചിയച്ചതുക റഫ് എസ്റ്റിമേറ്റ് ആയി കണക്കുകൂട്ടിയത് വളരെ അധികമാണെന്ന് വിലയിരുത്തിയതും, ആയതിനായി നടപ്പ് സാമ്പത്തിക വർഷത്തിൽ മുൻ വർഷത്തിൽ അനുവദിക്കപ്പെട്ടതിനത്രയും തുക കണ്ടെത്താൻ കഴിയില്ല എന്ന തീരുമാനവും വിലങ്ങുതടിയായി.

കേന്ദ്ര ഉപരിതല ഗതാഗത മന്ത്രി നിതിൻ ഗഡ്കരിയുമായും, എൻ.എച്ച്.എ.എൽ ചെയർമാനുമായും ചർച്ച നടത്തുകയും, പാർലമെൻ്റിൽ വിഷയമവതരിപ്പിക്കുകയും ചെയ്തതിൻ്റെ അടിസ്ഥാനത്തിൽ 3 സാധ്യതകൾ തേടുന്നതിനായി എൻ.എച്ച്.എ.എൽ തീരുമാനിച്ചു.

1) റഫ് എസ്റ്റിമേറ്റിൽ കുറവ് വരുമോയെന്ന് സൂക്ഷ്മ പരിശോധന നടത്തുക.
2) ചിലവ് കുറയ്ക്കാൻ പുതിയ അലൈൻമെൻ്റ് കണ്ടെത്തുക
3)സംസ്ഥാന സർക്കാരിന്റെ ഭാഗത്തുനിന്നും 50% ചിലവ് ആവശ്യപ്പെടുക.

ഇതിൽ ഒന്നാമത്തെ സാധ്യത പരിശോധിച്ച് ഉറപ്പുവരുത്തി പദ്ധതി മുന്നോട്ട് പോകുക എന്ന നിലപാട് ആണ് താൻ സ്വീകരിച്ചിട്ടുള്ളത്. സമയബന്ധിതമായി ഭൂമി ഏറ്റെടുക്കൽ നടപടികളിലേക്ക് കടക്കാതെ സമയം പാഴാക്കി കഴിഞ്ഞ സാമ്പത്തിക വർഷം അനുവദിക്കപ്പെട്ട തുക ചിലവഴിക്കാത്തതിന് വലിയ വില നൽകേണ്ടി വന്നിരിക്കുകയാണിപ്പോൾ.

ഈ ഘട്ടത്തിൽ വേഗത്തിൽ നടപടി പൂർത്തീകരിച്ച് കേന്ദ്ര സർക്കാരിനെ കൊണ്ട് അനുകൂല നിലപാട് സ്വീകരിപ്പിക്കാൻ എല്ലാവരുടേയും പിന്തുണയുണ്ടാവണമെന്നും,നാടിൻ്റെ വികസനം ആഗ്രഹിക്കുന്ന എല്ലാവരും ഒരുമിച്ച് നിൽക്കണമെന്നും ഡീൻ കുര്യാക്കോസ് അഭ്യർത്ഥിച്ചു. മുനിസിപ്പൽ ചെയർമാൻ പി പി എൽദോസ് ഒപ്പമുണ്ടായിരുന്നു.