പ്രകാശ് ചന്ദ്രശേഖർ

കോതമംഗലം;ദേശീയ പാതയുടെ നവീകരണ പ്രവർത്തനങ്ങളുടെ ഭാഗമായുള്ള നിർമ്മാണ പ്രവർത്തനങ്ങൾ നടക്കുമ്പോൾ ഭീമൻ തെങ്ങ് കടപുഴകി.റോഡിലേയ്ക്ക് വീഴാതിരിയ്ക്കാൻ ജെസിബിയ്ക്ക് താങ്ങി നിർത്തി.പിന്നാലെ ഗതാഗതനിയന്ത്രണം.പോലീസും ഫയർഫോഴ്സും പാഞ്ഞെത്തി.

അപകട ഭീഷിണി ഒഴിവാക്കാൻ ക്രെയിൻ എത്തിച്ചും “രക്ഷാപ്രവർത്തനം”.ഒടുവിൽ ഫയർഫോഴ്സ് വിളിച്ചത് പ്രകാരം സ്ഥലത്തെത്തി, “ട്രീ സർജ്ജൻ” സാബുവിന്റെ ഇപെടൽ.നിമിഷങ്ങൾക്കുള്ളിൽ എല്ലാം ശുഭം.അപകട ഭീതിയൊഴിഞ്ഞ ആശ്വാസത്തിൽ അധികൃതരും കാഴ്ചക്കാരും.

ഇന്നലെ വൈകിട്ട് കൊച്ചി – ധനുഷ്‌കോടി ദേശീയ പാതയിൽ കറുകടം ചിറപ്പടിയിലാണ് സംഭവം.ഇവിടെ റോഡിനോടനുബന്ധിച്ചുള്ള കാന നിർമ്മാണത്തിനായി മണ്ണ് നീക്കുമ്പോഴാണ് സമീപത്തെ പുരയിടത്തിൽ നിന്നിരുന്ന 60 അടിയിലേറെ ഉയരം വരുന്ന തെങ്ങ് കടപുഴകിയത്.

ഇത് ശ്രദ്ധയിൽ പെട്ട കരാർ കമ്പനി ജീവനക്കാർ സ്ഥലത്ത് മണ്ണിടുത്തിരുന്ന ജെസിബി ഓപറേറ്ററോട് തെങ്ങ് താങ്ങി നിർത്താൻ നിർദ്ദേശിക്കുകയായിരുന്നു. എന്നിട്ടും അപകടഭീഷണി വിട്ടൊഴിയാത്ത സാഹചര്യത്തിൽ വലിയ ക്രൈൻ എത്തിച്ച് “ഊന്നും” നൽകി.

തെങ്ങ് ഏതുനിമിഷവും മറിഞ്ഞുവീണേയ്ക്കാമെന്നുള്ള ഭീതിമൂലം ഇതുവഴിയുള്ള വാഹനഗതാതവും തടഞ്ഞു.വിവരമറിഞ്ഞ് ഉടൻ കോതമംഗലത്തുനിന്നും പോലീസും ഫയർഫോഴ്‌സും സ്ഥലത്തെത്തി.ആദ്യ പരിശോധനയിൽ തന്നെ തെങ്ങ് മുറിച്ചുമാറ്റുക മാത്രമാണ് പോംവഴിയെന്ന് ഫയർഫോഴ്‌സ് സംഘത്തിന് ബോദ്ധ്യമായി.

തുടർന്ന് ഏത് അപകട സ്ഥിതിയിലും നിൽക്കുന്ന മരങ്ങൾ നിമിഷനേരം കൊണ്ട് മുറിച്ചുമാറ്റുന്ന ട്രീ സർജ്ജൻ എന്നറിയപ്പെട്ടിരുന്ന തൃക്കാരിയൂർ കടകുംപ്ലായിൽ സാബു കെ എബ്രാഹാമിനെ ഇവരിൽ ഓരാൾ വിളിച്ചുവരുത്തുകയായിരുന്നു.എത്തിയ ഉടൻ സാബു ജോലി ആരംഭിച്ചു.മിനിട്ടുകൾക്കുള്ളിൽ തെങ്ങ് നാശനഷ്ടങ്ങളൊന്നും സൃഷ്ടിയ്ക്കാതെ മുറിച്ചുനീക്കി.

ഈ സമയം ഇവിടെ പാതയുടെ ഇരുഭഗത്തും വാഹനങ്ങളുടെ നീണ്ട നിര രൂപപ്പെട്ടിരുന്നു.മുറിച്ചിട്ട തെങ്ങിന്റെ കഷങ്ങൾ മാറ്റിയതോടെ ഗതാഗതവും സാധാരണ നിലയിലായി.അപകടസ്ഥിതിയിൽ നിൽക്കുന്ന തെങ്ങുകൾ വ്യാപകമായി വെട്ടിമാറ്റിത്തുടങ്ങിയതോടെ അടുപ്പക്കാർക്കിടയിൽ “കോക്കനട്ട് ട്രീ സ്‌പെഷ്യലിസ്റ്റ്” എന്ന പേരിലും സാബു അറിയപ്പെട്ടുതുടങ്ങി.

മരങ്ങൾ വെട്ടിമാറ്റുന്നതിൽ മാത്രമല്ല,നാടിന്റെ ഏത് ആവശ്യത്തിനും സാബു ഓടിയെത്തുകയും തന്നെക്കൊണ്ട് ചെയ്യാൻ കഴിയുന്ന സഹായങ്ങൾ ലഭ്യമാക്കുകയും ചെയ്യും.

സാബുവിനെ ബന്ധപ്പെടേണ്ട നമ്പർ – 9744956777